Saroa Bikandi durangarra herririk herri eta liburutegirik liburutegi dabil azken urteotan. ‘Azalerako ipuinak’ egitasmoaren bitartez, ahozkotasuna eta haur literatura adin txikikoei eta haien familiei hurbildu gura izan diete. Orain, beste pauso bat eman eta, indarrak batuta, Hegoak lantaldeak, Saroa Bikandik, Peru Magdalenak eta Elorrioko Etxegiroan , Maria Uriarte eta Tomas F. Juanes, ekoiztetxeak ‘Azaleko Ipuinak’ CDa kaleratuko dute,  Quico Oug’es zaratagile eta aholkulari musikalarekin batera. Saguganbaran aurkeztuko dute lana, gaur, 13:30ean. 

Kaiolek apaintzen dute Txoria Nuen Maite taberna, zabalik dauden kaiolek. Askatasunari egindako keinua da hori, Mikel Laboaren kanta gogoratuz. Atxo Fun Fun izenagaz hasitako 20 urteko bidea islatuko duen argazki erakusketa prestatu dute Petralanda anaiek. Tabernan lan egindako guztiak gonbidatu dituzte ospakizunera. Gaur, Dj Sonidero Galernak ipiniko du musika, 19:00etan, eta Havana 537 talde kubatarrak joko du. Bihar, Dj maratoia hasiko da, 16:00etan. Donostiako Gross Craft Beer-ek propio egindako garagardoa ere aurkeztuko dute.