Zelan jaio zen 'Boletus al Gusto'?
Aitor Arkarazo: Bioi gustatzen zaigu jatea, ondo jatea. Horrek gaztetatik kozinarako zaletasuna piztu digula uste dut. Lagunarteko zein oporretako planetan askotan egokitu digute sukaldeko lana. Eta orain uda bi, Portugalen, kozinatzen geundela bideoak sortzea eta sareetan zabaltzea bururatu zitzaigun.
John Plaza: Kuadrillakoentzat hanburgesak prestatzen hasi ginen, gero 16 lagunentzat risottoa egin genuen... Boletus al Gusto gure esperientzia gastronomikoak sareetan zabaltzeko eta partekatzeko proiektua da, errezetak edo jatetxeren batean probatu ditugun platerak erakusteko baliatzen dugu.
Zein da zuen helburua?
J.P.: Ondo pasatzea. Errezetak partekatu eta kozinatzen ikasten jarraitu gura dugu, asko disfrutatzen dugulako. Kozinatutakoa probatzen dugun unea da onena. Biok elkarregaz egoteko eta egunaz berba egiteko aprobetxatzen dugu. Edonork egiteko moduko platerak erakusten ditugu, ez dute zailtasun handirik.
A.A.: Bai, ez daukagu helburu finkorik. Normalean, eguenetan batzen gara kozinatzeko, pintxo-potera joan baino lehenago. Neure burua errezetak lantzera eta egunerokoan egingo ez nituzkeen platerak prestatzera behartzeko modu bat da, gero gure jarraitzaileei erakusteko.
Non ikasi duzue kozinatzen?
A.A.: Neure kabuz ikasi dut. Bideoak ikusita, errezetak probatuta... halantxik sortu zitzaidan zaletasuna. Etxetik kanpora bizi izan nintzenean, Bartzelonan (Herrialde Katalanak), asko ikasi nuen. Badut lehengusu bat apur bat eredu izan dudana beti, eta hari ere gustatzen zaio ondo jatea, batera eta bestera ibiltzea...
J.P.: Etxean oso eredu onak izan ditut. Gurasoek eta aitita-amamek asko kozinatu dute beti. Aitagaz plater klasikoagoak egiten ikasi dut; amagaz internazionalagoak, Kanadan bizitakoa da eta. Biekin asko disfrutatzen dut.
Ingeniaritza kontzeptuak ondo egokitzen dira sukaldaritzan?
A.A.: Bai, igual ingeniaritza kimikoaren kasuan. Baina gure ingeniaritza arloek zerikusi gutxi dute sukaldaritzagaz.
J.P.: Ingeniari legez oso zehatzak eta espezifikoak izan behar dugu. Kozinatzerakoan, ostera, ez gara horren zorrotzak. Neurriak egokitu egin ditzakegu eta aukera gehiago dugu inprobisatzeko eta platerak nahierara prestatzeko.
Beraz, ondo uztartzen dira.
J.P.: Bai. Ingenieritza gure ogibidea da eta gure denbora librean sukaldean aritzen gara, ondo pasatzeko asmoagaz.
A.A.: Ondo pasatzeko eta ondo jateko. Sukaldaritza eguneroko errutinatik irten eta deskonektatzeko era bat da, terapia moduko bat. Ederra izaten da etxera heldu eta ordu erditxo bat hartzea biharamuneko tuperra prestatzeko. Jaterakoan ederto eskertzen dugu hori.
Zelan ikusten duzue etorkizuna?
J.P.: Orain arte legez jarraitu gura genuke.
A.A.: Durangoko Gure Kabya tabernako 500 pintxo egin genituen pintxo-pote baterako, eta Ai Ama berria zabaldu zenean ere ibili ginen, Sushi Galery-koekin batera. Esperientzia politak izan dira eta ondo legoke horrelako elkarlan berriak sortzea, pauso bat aurrera egitea.