Beste udazken batez, Elorrio jazz eta blues doinuz bustiko da, bertako jazz eta blues jaialdiagaz. Hiru hamarkadaren ondoren, jaialdiak ohiko filosofiari eusten dio: alde batetik, jazz eta blues doinuen eskaintza anitza edukitzea, eta, bestetik, Euskal Herriko zein nazioarteko joeren eraskulea izatea. Iaz lez, Durangaldeko talde baten emanaldiagaz hasiko da kontzertu sorta: Mocker´s hirukote gazteak Oreka Ahula aurkeztuko du Ateneon.

Musika tresnei hautsa kendu eta musika hotsa Elorrioko zein Euskal Herri osoko kaleetera zabaltzeko asmoz, lagun talde batek Fanfarrixo txaranga sortu du Elorrion. Egun, hamabi lagun dabiltza taldean, eta taldeko zuzendari Leire Balerdik ANBOTOri azaldu dionez, eurena "hutsetik" sortutako taldea da. Eurek aukeratu dituzte izena, janzkera eta abar.