Jon Morcillo Conesa (Zornotza, 1998) neguko merkatuan heldu zen Almeriara. Albaceten nekez ikusten zuen helburuak askoz ere gertuago zirudien talde andaluziarrean: Lehen Mailara itzultzea, bere sasoian Athleticegaz bizi izan zuen mailara. Baina hatz puntekin ikututako lorpenak ihes egin zien azken unean. Finalean, Malagatik emaitza onagaz (0-0) bueltatu ziren arren, etxean ezin izan zuten kanporaketa errematatu (1-2). Kolpea oraindino guztiz gainditu ez badu ere, hegaleko jokalari zornotzarrak baikor begiratzen dio etorkizunari.

Zaldibarko Zaldua Kirol Elkarteak urteko batzar orokorra egingo du zapatuan, 11:00etan, herriko liburutegi zaharrean. Batzarraren gai nagusietako bat zuzendaritzako hiru arduradunen dimisioa izango da. Arkaitz Padilla presidenteak, Arsenio Juarrero diruzainak eta Auritz Maortua idazkariak kargua utziko dutela iragarri dute.