Zapatu honetan ibilbide biko BTT martxa solidario bat egongo da Elorrion. Palestinako herriari elkartasuna adieraztea eta han laguntza humanitarioa ematen dabilen Gobernuz Kanpoko Erakunde batentzat dirua batzea dira martxaren helburuak. Juanjo Obregón Elorrio Palestinarekin mugimenduko kidea da eta Zugaitz Ayusok bizitza osoa darama bizikleta munduari lotuta. Mugimenduaren eta hainbat herritarren artean antolatu dute ekimena.

Mañariko pilotalekuak Cafés Baqué Pilota Txapelketaren 39. aldiko finalak hartuko ditu gaur, 18:30ean. Ricardo Inzunza (Mañaria, 1953) txapelketaren sortzaileetariko bat da eta sari banaketan parte hartuko du. Esku pilota barru-barrutik bizi du, bai profesionalena bai afizionatuena, eta kirol horren bilakaeraren lekuko izan da urte luzez.