Eneko Sagardoy aktore durangarrak harituko du ekitaldia, eta Igor Elortza eta Peru Magdalena aritu dira gidoigile. Jaialdiaren sinopsian aurreratu dutenez, “euskaldunon kultura berpizkundearen mitoak bizi du. Lur jotze eta hegaldatze etengabean dabil; lurperatu ere egin nahi izan dute sarri. Baina beti egin du haizetara”. Beraz, ideia horretatik abiatuta jarri diote jaialdiari izena. Ondoren, Jon Eskisabelek Hamar Urteko Gaua musika saioari ekingo dio, gaua biribiltzeko.
Azoka egunetako kontzertuak
Platerueneko oholtzak bestelako kontzertu eta ekitaldiak ere hartuko ditu Durangoko Azokaren egunetan. Euskal musikagintzan dabiltzan hainbat taldek beraien nobedadeak zuzenean aurkezteko baliatuko dituzte lau egunak. Hesian eta Vendetta taldeek abenduaren 5ean eskainiko dute kontzertua. Abenduaren 7an, berriz, Gernikako Gatibu taldearen txanda izango da. Sarrerarik eskuratu ez dutenek gaitz izango dute txartela lortzea, orain aste batzuk agortu zirelako. Saioa taldeak Bi lana aurkeztuko du abenduaren 7an, 14:00etan. Kamila Zubeldia eta Marieder Iriart dira taldeko kideak. Durangoko Azokako egitarauagaz amaitzeko, Nafarroako Kometa taldeak zuzenekoa eskainiko du 19:00etan.
