Alicia Ruiz de Infante diputatu arabarrak esandakoei erantzun die Durangoko Udalak. "Foru diputatuak dio kexak murriztu egin direla, baina autobuseko erabiltzaileek diote Durango eta Gasteiz arteko autobus zerbitzuak eragindako arazoek bere horretan jarraitzen dutela". Horregatik, erabiltzaileei kexak aurkezteko erraztasunak ematea erabaki du udalak. Herritarren Arretarako Zerbitzuan formulario bat bete behar dute erabiltzaileek, eta gero udalak eroango ditu guztiak Gasteizera.
Ruiz de Infantek, Aldundian EAJren galderei erantzunez, adierazi zuen Alsa enpresak 2015era arte daukala zerbitzuaren esleipena, eta bitartean ez dutela hobekuntzarik egingo zerbitzuan. Durangokoak dira zerbitzuaren erabiltzailen %80, eta 160 lagunek kexa aurkeztu zuten iaz udalean.