Etxerat-ek twitter bidez jakinarazi duenez, autopsien "atariko emaitzek erakusten dute bat-batean eta berez" hil zela Arkaitz Bellon. Gaineratu dutenez, "13 urteko tortura, jipoi eta tentsioen ondorioa da". Bellonen lagunek manifestazioa deitu dute gaurko. Arratsaldeko 17:30ean hasiko da gaur manifestazioa plazatik, 'Espetxe politika honi ez, sakanbanaketa amaitu' lemapean. Jendetza batu zen atzo Bellonen lagunekin deialdia egiteko. Hunkituta egin zituzten adierazpenak.
"Oraindik sinistu ezinik, berri honek lur jota utzi gaitu". Arkaitz Bellonen lagunek agerraldia egin zuten atzo, gaurko protesta deitzeko, eta hil berri den presoa zelakoa zen kontatu zuten: "Bihotz zabalegia, bizitzea tokatu zaizun garairako". Lagunen laguna zela, musika taldeko laguntzaile, natura zale amorratua, Gaztetxeko "saltseroa", ikastaroetako "gatz eta pipermina"...
Gogoratu dute hainbat kartzelatan egon dela dispertsatuta: Valdemoro, Ocaña, Herrera, Algeciras, Puerto III, Sevilla eta Puerto I.ean. Funtzionarien partetik jipoiak salatu zituen Bellonek hirutan, eta momentu horien gogoan izan dituzte. Kalean zein kartzelan errebelde izan zela esan dute: "Bizitzarekin, daukagun ondasun guztiarekin, larrutik ordaintzeraino".
Gaurko manifestazioaren zergatia arrazoitu dute amaieran: "Berriro gerta ez dadin, beste inork guk jasandakoa berriz sufritu ez dezan, beharrezkoa da kalera irtetea".
