Airearen kalitateagatik sortutako kezka goraka etorri da azken hileetan, batez ere sare sozialetan, eta airea hobetzeko aldarria kalera helduko da orain. Oharrean diotenez, aireak osasunean izan dezakeen eraginak kezkatzen ditu, Osasunaren Mundu Erakundeak esana baitu partikula horiek minbizi sortzaileak eta arnas-aparatuko gaixotasunen eragileak izan ahal direla. Gogoratu dute neurketen grafikoek partikulen maila altuak erakusten dituztela, baina momentu askotan neurtzeari uzten diotela, eta beraz, ezin dela jakin zehaztasunez zein den egoera. "Eskatzen dugu beharrezko neurketa denak hartzea arazoaren iturburua zein den ziurtasunez jakiteko eta hau konpontzeko zein ekintza egin eta zein neurri hartu behar diren zehaztea".
Deialdi anitza da, eta adostasun hori nabarmendu dute eurek ere. "Erreklamazio gutxik lortzen dute durangarren artean adostasun gehiago". Herritarrek sarritan eurengana jo izan dutela ere azaldu dute elkarteek.
