PM10 suspentsioko partikulen arloan, maiatzean eta ekainean 12 egunetan airea ez zen ona izan; maiatzeko 6etan hobetzeko modukoa izan zela diote datuek, eta ekainean 4tan hobetzekoa eta 2tan txarra. Uztailean 3 egunetara murriztu zen egun kopuru hori, abuztuan 2tara, eta irailean 1era. Guztira, Jaurlaritzaren datuen arabera, airea ona edo oso ona izan da egunen %88an, hobetu daitezkeenak %10, eta txarrak %2.
Enpresak, urtze-iragazkia egokitu du, harrikatz eta bentonita siloen barne-iragazkiak itxi, albo fatxadaren kanpo estalkia konpondu eta fatxada ere konpondu. Aurrerantzean ere udalak pausoak eskatuko dizkio. "Nahiz eta badirudien hartutako neurriekin emaitzak hobetu direla, udal ordezkariok kezkatuta jarraitzen dugu herriko airearen kalitatearekin. Egoera horren aurrean, enpresari hobekuntzak egiten jarraitzeko eskatu diogu", esan dute oharrean. Udalaren arabera, enpresak proiektu bat aurkeztu du abenduko eta abuztuko geldialdietan hobekuntzak egiten jarraitzeko.
