Hainbat hilabeteetan probaldian egon ostean, ekainean jarri zuten martxan Trabakua gaineko tarteko radarra.
Trabakua gainean dagoena tarteko radar bat da; hau da, tarteko radarrak puntu bitan hartzen du ibilgailuaren abiadura, eta batez bestekoa ateratzen du. Gehienezko batez bestekoa 60 kilometro ordukoa da. Gaur egun Euskal Autonomia Erkidegoan martxan dagoen tarteko radar bakarra da, Jaurlaritzako iturrien arabera. 2010ean, mota honetako lehenengo radarra ipini zuten N-1ean, Ordizia eta Irura artean, eta urtebetean egon zen indarrean.
Urtarrilean Arantza eta Pantxo taldeko Pantxo Cruz musikaria hil zen, 69 urte zituela. Argentinan sorturikoa izan arren, eskualdean bizi izan da urte askoan Pantxo Cruz (Argentina, 1952). 1997az geroztik gainera, Arantza Salterainegaz batera herriz herri eta plazaz plaza aritu da kantuan. Arantza eta Pantxok beraien musika ibilbide luzean disko bi kaleratu dituzte, azkena 2017an, Todo Cambia izenekoa.
Bi urteren ostean, gogotsu hartu zuten durangarrek jaietako mozorro eguna.
Abenduan Jose Antonio Azkorbebeitia Gerediaga elkarteko ohorezko bazkidea hil zen 73 urtegaz. Azkorbebeitia 60-70eko hamarkadan euskarazko alfabetatze eskoletan irakasle aritu zen. Sasoi hartan, euskal aldizkarietan, herrietako berri emailea izan zen. Gerediagako bazkidea ia sorreratik izan da baita batzordeko kidea ere. Mendiolako eskolaren historia eta Abadiño ezagutzen liburuen idazleetariko bat izan zen. 2014tik Abadiñoko Gure Esku dinamikan parte hartu zuen, besteak beste.
