Aurreko asteburuan Durangoko merkatuak egin bezala eta asteon Traña-Matienakoak egin bezala, Zornotzaren txanda da orain. Udalak jakinarazi du domeka honetan bertan ostera ere zabalduko dituela ateak Ixerren egiten den baserri azokak. Guztira, 6 baserritar egongo dira nekazaritza eta abeltzaintza produktuak saltzen.
Zornotzako Udalak ezarritako segurtasun neurriak honakoak dira:
- Denek, bai erosleek eta bai saltzaileek botatzekoak diren eskularruak eta desinfektatzeko gela erabili beharko dituzte (bertan egongo dira)
- Erosleen arteko distantzia 2 metrokoa izango da
- Saltzaileek 4 metroko distantzia ezarriko dute postuen arteko distantzian eta 6 metrokoa kontsumitzaileak igarotzen diren pasabideetan. Postu berean langile bat baino gehiago balego, gutxienez bi metroko distantzia egon beharko da bien artean. Hori ezinezkoa balitz, pertsona bakarrak egon ahalko du postuan.
- Agintariek segurtasun neurri hauek betearaziko dituzte, eta azokara sartzea ere kontrolatuko dute, jende pilaketarik egon ez dadin.