Zaldibarko pentsiodunak kalera irten dira gaur, udalerriko osasun zentroan pediatrarik ez dagoela eta mediku bakarra dagoela salatzeko (Osakidetzak bi mediku dizkio esleituta udalerriari). Horrez gainera, "opor sasoia" dela eta, astebete barru "medikurik barik" gera daitezkeela ohartarazi dute: "Lanpostu hori urrira arte bete barik" geratu daitekeela diote pentsiodunek.
Era honetako protestak ez dira berriak Zaldibarren. 2024ko irailean, herritarrek behin baino gehiagotan kaleratu zuten osasun zerbitzuagatiko kezka. Irail hasieran, medikurik barik geldituko zirela jakinarazi zion Osakidetzak udalari, eta herritarrak kalera irten ziren protestan. Une hartan, Elorrioko anbulatoriora bideratu zituzten zaldibartarrak. Gerora, osasun zerbitzuek udalerrian mediku bat egongo zela iragarri zuten. Azkenik, urri hasieran, hilaren 23tik aurrera mediku bi egongo zirela jakinarazi zuten.