Zaldibarko Olazar pilota txapelketako antolatzaileek zuzeneko emankizunak egiten dituzte eguenero. Youtube-n ez ezik, ANBOTOren webgunean ere jarraitu ahalko dira emankizunak. Koldo Aldalur kazetari ezaguna izan ohi da esataria (gaur Aritz Gallastegi kazetaria ariko da) eta Enrike Agirrebeitia komentarista.
Joan zen asteko finalerdia
Joan zen astean gizonen lau eta erdiko finalerdiak jokatu ziren. Lehenengoan, Zubizarretak 22-8 menderatu zuen Irribarria. Zubizarreta aurretik joan zen partidu osoan zehar: 6-1 / 10-4 / 20-7. Bigarren finalerdia lehiatuagoa izan zen. Ariztegik 22-16 irabazi zion Egigureni. Ariztegi 8-1 aurreratu zen, baina Egiguren aurretik heldu zen partidu erdira: 9-12. Ondoren, parean aritu ziren tanto batzuetan (16-14) harik eta azken txanpan Ariztegi nagusitu zen arte.