Horrelako gertaeren aurrean udalak hartuko duen jarrera zein izango den ere jaso dute aho batez onartu duten mozioan. "Horrelako gertaera gehiagorik ez egotea espero dugu, baina gertatuz gero, udalak zelan jokatu jakiteko jarraibide bat izan daiteke", esan du Bilduko Zorion Agirrezabalek. EAJ "puntuz puntu" ados dago idatziarekin. Iñaki Totorikaguena alkatearen berbetan, "denbora pasa da gertakaritik, baina mozioak badu zentzurik oraindik; zoritxarrez askotan gertatzen direlako horrelakoak. Beti egon gara eta egongo gara erasotzailearen kontra eta erasotuaren alde".
Herrian norbait erasotzailea edo erasotua dela baieztatzen bada, udala akusazio partikular lez aurkeztea onartu dute, eta neurriak hartzean "erasotuarekin adostuta eta bere askatasuna errespetatuz egitea". Erasoa "batere injerentzia barik" ikertzea exijituko dute eta ez dute onartuko "biolentzia matxista darabilten erasotzaileak inpunitatez aritzerik". Emakumeen eskubideen "defentsa irmoa" herriko agintean daudenen "ardura eta erantzukizuna" dela onartu dute.
PSE-EEk eta PPk ere mozioaren alde bozkatu dute
