Atzo hasi zen Emakumeen Bira. Holandarrak esprintean irabazi zuen Iurretan hasi eta amaitu zen etapa, sasoi betean dagoela argi utziz.
Martitzenean Durango-Durango klasikoa irabaztetik zetorren Marianne Vos txirrindulariak indartsu hasi du Emakumeen Bira; etapa irabazteaz gainera, lider eta erregulartasunaren maillotak jantzi ditu; esprintean gailendu da txirrindulari holandarra. Podiuma, Ina Teutenberg eta Elizabeth Armiststead txirrindulariek osatu dute. Guztira, 01:54:38 behar izan du 75 kilometroko etapa burutzeko. Lehendabiziko euskal herritarra Eneritz Iturriaga abadiñarra izan da; 81.postuan amaitu zuen.
Atzo hasi, eta domeka arte, goi mailako txirrindulariak lehiatuko dira euskal errepideetan. Hain zuzen ere, 18 taldek parte hartuko dute aurtengo Emakumeen Biran, tartean, Diadora-Pasta Zara, Nederland Bloeit, Lotto edota Fassa Bartolo. Etxekoak ere saiatuko dira podiumeko lehenbiziko koskara igotzen; Eneritz Iturriaga abadiñarra eta Debabarrena-kitolgi taldeko Leire Olabarriak lehian arituko dira. Jon Elorriagak gidatzen duen Bizkaia-Pandak ere parte hartuko du lehian.
Atzoko etaparen ostean, gaur arratsaldean bigarrena abiatuko da, 15:30ean; Iurretatik irtengo da pelotoia, eta faboritoek aldeak egiteko aukera ona izango dute; Lekeitioko helmuga zeharkatu aurretik, Milloi birritan igo beharko dute-eta. Biharko etapak, hirugarrenak, bi sektore izango ditu. Goizean, Elorriotik Kanpazarrerako kronoigoera (7,6km) egin beharko dute. Arratsaldean, ostera, Deba-Deba etapa egongo da. Azken etapa, jada klasiko bilakatu den Urduña-Urduña izango da. Domeka goizean ekingo diote ibilbideari, eta 3.mailako Garate eta 2.mailako Barrerilla igo ostean, Urduñako igoerari ekin beharko diote txirrindulariek. Erabakigarria izan daiteke azken igoera hau.
[img]http://www.anboto.org/images/9600/9612/1.jpg[/img]
