Eguerdian, 12:00etan, Ezkurdi eta udaletxeko plaza giza kate baten bitartez lotuko dituzte. Ondoren, mosaiko bat osatuko dute, distantziak mantenduz. Preso durangarrari gutunak idazteko aukera ere eskainiko dute, baina gutunak etxetik idatzita eramateko eskatu dute antolatzaileek, jende pilaketak ekiditeko.
Martitegi uztailean espainiaratu zuten, Frantziatik, eta lehenengo unetik isolatuta egon da Soto del Realgo kartzelan, Madrilen. Une honetan, Martitegiren moduloan bera dago bakarrik; ez dago beste presorik gune hartan. Gainera, isolamenduaren ondorioz, patio orduak eta komunikazioa murriztuta ditu eta ezin du kartzelako ekintzetan parte hartu, besteak beste.
Gerturatu dituztenak
Bestalde, Durangaldeko hainbat preso gerturatu edo Euskal Herriratu egin dituzte azken hileetan. Ekainean jakin zen Gorka Lupiañez durangarra Salamancatik Logroñoko espetxera hurreratuko zutela. Espetxe horretara bertara lekualdatuko dituzte Itziar Alberdi durangarra eta haren bikotekide Josu Narbaez ere. Biak Madrilgo Estremera kartzelan egon dira. Aitzol Maurtua atxondarra Huelvatik Palentziara gerturatuko dute, eta, azkenik, Oier Andueza durangarra Euskal Herriratu egingo dute: Murtziatik Basauriko kartzelara.