Durangoko EAJk herriko batzokiaren aurkako eta Artekalen duen lokalaren aurkako pintaketak gaitzetsi ditu. Azaldu du Durangoko pintaketegaz jada 12 direla Euskal Herrian antzerako "erasoak" izan dituzten batzokiak. Gertatutakoak "Durangoko herritarrek merezi duten bakearen eta bizikidetzaren aurka" egiten duela azaldu du. Bestalde, "elkartasuna" agertu du Herriaren Eskubidea taldearekiko, azken hauen egoitzan izandako pintaketa berdintsuak direla-eta. Jeltzaleek aurreratu dute hurrengo osoko bilkuran adierazpen bat egitea proposatuko dutela.
Herriaren Eskubideak ere "arbuiatu" egin ditu margoketak. Sare sozialetan azaldu duenez, talde moreak gaitzetsi egin ditu "Goienkalen duen egoitzan agertu diren pintaketak eta baita Batzokian, PSE-EEren egoitzan eta EAJren hauteskunde lokalean agertu direnak".