Aitziber Irigoras alkateak (EAJ), Pilar Rios alkateordeak (PSE-EE) eta Dani Maeztu zinegotziak (EH Bildu) eman dute ekimenaren berri prentsaurrekoan. Irigorasek azaldu du etxebizitza eta enplegu politikak sustatzea izan zela gobernu taldearen akordioaren oinarria, eta proiektu honetan biak uztartzen direla. Akordioa lortzeko hiru alderdiek eginiko "lan itzela" aitortu du alkateak. Riosek adierazi du alokairua dela "aukera bideragarri bakarra" gazteentzat, eta hori sustatu gura dutela ekimenagaz. Izan ere, etxe hutsen jabeei informazioa eskaintzea ere bada euren asmoa. Bestalde, San Fauston gazteei begira alokairu sozialean ipiniko dituzten txandakako 6 etxeen arautegia -beste 5 ere eskainiko dituzte laster- datorren osoko bilkuran onartuko dela aurreratu du.
Proiektu bi horien elaborazioaren eta akordioaren parte izan da EH Bildu, eta horregatik plazaratu da gaur prentsaurrekoan gobernuagaz, ez ohiko irudia sortuz. Zabalduko Ditugu gazte mugimenduak alokairu sozialaren aldeko mozioa aurkeztu zuela gogoratu du Maeztuk, eta errolda osatzea horretarako lehen pausoa izango dela. Bestalde, erroldari esker etxe hutsei zerga berezi bat ezartzeko modua ere egongo dela adierazi du, merkaturatzea sustatze aldera.
