anboto.org

Gazteentzako alokairu sozialerako plan bat sortzea onartu du udalak

  Gizartea  Durango

Durangon ia 1.500 etxe hutsik dauden bitartean, hainbat gaztek emantzipatzeko laguntza eskatu dute. Bada, gazteentzako alokairu sozialerako plan bat sortzea onartu du udalak, Zabalduko Ditugu mugimenduak aurkeztutako mozioa babestuta. Alderdi guztiek alde bozkatu zuten osoko bilkuran, PPk izan ezik.

Gazteentzako alokairu sozialerako plan bat sortzea onartu du udalak
Luisa Oleaga eta Ane Amantegi Zabalduko Ditugu mugimenduko kideak. | Ikusi handiago | Argazki originala

Gazteek hiru proposamen nagusi egin dituzte: udalaren etxe hutsak alokairu sozialera bideratzea, banketxeen etxe hutsekin programa bat sortzea eta udala bitartekari izatea gazteen eta etxejabe diren herritarren artean. Horrez gainera, alokairu sozialerako baldintza batzuk proposatu dituzte; besteak beste, gehienez 125 euroko alokairua ordaintzea eta lan kontraturik beharrezko ez izatea. Eurena, “sektore bereziki prekarizatua” dela diote.

Baldintza horiek guztiz ez dituztela onartzen ohartarazi zuen Pilar Ríos alkateordeak (PSE-EE) gobernuaren izenean, baina aurrera begira lanean jarraitzeko asmoagatik mozioa babestu dutela. Bestalde, BBKgaz hitzarmen baterako tratuan daudela aurreratu zuen, baina oraindik ez dagoela ezer lotuta. Udalak etxejabe eta eskatzaileen arteko bitartekaritza programa bat hasi zuen iaz, baina ez zen ondo atera; soilik etxe bi sartu ziren, Jon Bingen Landabidearen (EH Bildu) esanetan.

7 etxe Faustegoienan
Orain, onartutako planaz gainera, Faustegoienako zazpi etxe 18 eta 35 urte artekoentzat alokairu sozialean ipiniko ditu instituzioak. Zabalduko Dituguko kideek ekimen horren araudian parte hartzea eskatu dute, argitu arren ez dela nahikoa gazteriaren beharrizanak asetzeko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa