Txakurren ordenantzaren inguruan ere, "aurrerapausoak" eman dituztela azaldu dute Durandogeko kideek. Txakurren jabeak kexu ziren, 1996ko ordenantzarekin, eta araudi berria sortzea eskatu zuten. Aldarrikapen hori kaleratzeko elkarretaratzea egin zuten orain hiru hilabete udaletxe aurrean. Udaleko plenoak aho batez onartu zuen aldaketa egitea. Hala ere, Durandog elkarteko kideek, ordenantza berria sortu eta indarrean jarri bitartean, behin behineko araudi bat eskatu zuen. Udalak orain aste batzuk aurkeztutako proposamenarekin ez zuten bat egin. Txakurrak askatu ahal izateko udalak bost berdegune proposatu zituen Durangoko kanpoaldean, gaueko 22:00etatik goizeko 10:00etara. Banpiroen ordenantza izena jarri zion elkarteak proposamenari.
Joan zen barikuko batzarrean, Durangoko berdeguneetan goizez 08:00etatik 11:00etara eta arratsaldez 20:00etatik 23:00etara txakurrak askatu ahal izatea izan zen udalaren proposamena. Durandogeko kideek proposamena ontzat eman zuten. Behin behineko araudia irailera arte egongo da indarrean. Bitartean, udalak ordenantza berria erredaktatu eta plenotik pasatu beharko du.