Herritarrek hiru arrazoi agertu zituzten: udaleko sarrerak justifikatu barik haztea, zorra ez islatzea eta lurzoruagatik jasotako diruagaz zer egin ez zehaztea. Horri erantzunez, kontu-hartzaileak azaldu zuen sarrera eta gastuen aurreikuspenak kontrastatu direla. Zorraren inguruan, BBKtik jasotako mailegua ez dela erabili adierazi zuen, eta lurzoruagatik jasotako eskubide batzuk ez hartzea erabaki zela, agian ez zirela erabiliko aurreikusita.
Bilduk eta Aralarrek herritarrak babestu zituzten. Besteak beste, Dani Maeztuk (Aralar) azaldu zuen erakunde autonomo bateko gerenteak esan ziola agintzen diotenagaz alderatzen dituela berak datuak. Eider Uribek (Bildu) gogoratu zuen udalak bost milioi euroko soberakina daukala, eta horregaz zer egin erabakitzeko ez dituztela herritarrak kontuan hartu.
Goiztidi Diazek (EAJ) kontu-hartzailea defendatu, eta aurrekontuak zentzuagaz egiten dituztela adierazi zuen.