2009ko aldia berezia izan zen gainerakoekin alderatuta, Athleticek 24 urte zeramatzalako Kopako finalik jokatu barik. Koikili Lertxundi otxandiarrak eta Fernando Amorebieta iurretarrak osorik jokatu zuten partidu hura. Amorebietak 2012ko finala ere jokatu zuen, berriro ere hasierako hamaikakoan zelairatuta. Athleticek hiru urte geroago jokatu zuen hurrengo finala, 2015ean. Xabi Etxeita zornotzarrak partidu osoa jokatu zuen. Bestalde, Ander Iturraspe abadiñarra azkenengo ordu laurdenean zelairatu zen, Mikel Rico ordezkatuta. Sasoi hartan, Iturraspe ohikoa zen hasierako hamaikakoan, baina aste bi lehenago Europa Leagueko finala hasieratik jokatuta, aulkian hasi zuen Errege Kopakoa.
2020ko eta 2021eko finaletan —biak 2021ean jokatu ziren, pandemiagaitik— ez zen eskualdeko jokalaririk izan zelaian. Jon Morcillo zornotzarrak aulkitik jarraitu zuen bigarren finala, Bartzelonaren kontrakoa. Hain zuzen ere, iazko abuztuan Morcillo Athleticek utzita Amorebietara joan zenetik, talde zuri-gorrian ez dago eskualdeko ordezkaririk.
Zelaian ezin izan zutena harmailetan ospatu gura dute. Koikili eta Etxeita Athleticeko bazkideak dira eta finalerako sarrerak egokitu zaizkie. Lehenengoz biziko dute Athleticen Kopako final bat harmailetan.