Urkiola Landa Garapeneko Ibon Goitia teknikariaren berbetan, "Durangaldeko tokiko produktuak eskualdean saltzen diren arren, ez dute behar besteko ikusgaitasunik. Dendariek eta ostalariek egiten duten esfortzuak ez du merezitako saria" izaten. Hori dela eta, komunitate "indartsu, dinamiko eta egonkor bat" sortu gura dute, herritarrek tokiko produktuekiko jarrera errotu dezaten.
Kontzientzia zabaltzen
Goitiak dioenez, janari osasuntsuagazko kontzientzia apurka-apurka zabaltzen dabil Durangaldeko herritarren artean. Sektoreak baditu egonkortzeko aukerak. Baina baditu arriskuak ere. Izan ere, Goitiak aipatu du azken urteotan "jaitsi" egin dela nekazari eta abeltzain kopurua, eta errelebo falta "arazo handia" izatera ailegatu dela. Ostalariei eta komertzioei buruz ere, beste horrenbeste. Tokiko komertzioak eta ostalaritzak daukaten gainbeherako joerari aurre egiteko ekimen eta aliatu berrien premian daude. "Erosteko moduak asko aldatu dira, eta bertoko produktuak erosteko ohitura ere jaitsi egin da", azpimarratu du Goitiak. Egoera horri aurre egiteko, beharrezkotzat jo du Durangaldean ekoizturiko elikagaiak bertoko kontsumitzaileen eskura ipintzea.
Proiektura atxikitako dendariek eta ostalariek Elikatu Durangaldea izeneko ikur identifikatiboak dituzte establezimenduetan. Horrez gainera, dinamikaren bultzatzaileek aurreratu dute datozen asteetan ekoizleen zein denden banakako aurkezpenak egiten hasiko direla sare sozialetan eta buletinetan. Honako erreportaje honetan euretariko batzuk ezagutuko ditugu.
Elkarrizketatuak
- Esti Urrutxurtu (Firue denda, Abadiño): "Gazteek garrantzi gehiago ematen diote produktu ekologikoari; helduek, tokikoari"
- Beñat Alberdi (Alberdi harategia, Durango): "Supermerkatuak ez ditut lehiakide zuzen lez ikusten, guk kalitatea eskaintzen dugu eta".
- Ana De la Maza (Garai Kontserbak, Garai): "Elikatzea ekintza politikoa da, kontzientzia izatetik praktikara pasatu behar dugu".