Eusko Jaurlaritzak orain aste batzuk altxatu zuen elkarte gastronomikoak zarratuta mantentzeko debekua, eta, apurka-apurka, lapiko zaratak Durangaldeko txokoak betetzen hasi dira. Hori bai, oraindino ezer ere ez da lehengoa. Osasun neurri ugari dago indarrean eta elkarteek hainbat muga dute. Ostarlaritzaren irizpideak bete behar dituzte. Edukiera erdira murriztuta dago, eta goizeko bederatzietatik gaueko ordu biak arte egon daitezke zabalik. Horrez gainera, mahai bueltan sei lagun batu daitezke gehienez ere.
Erreportaje honetan eskualdeko hiru herritako kideen testigantzak jaso ditugu. Txoko batetik bestera desberdina da errealitatea, baina kide guztiak bat datoz puntu honetan: elkarteko ateak zabaltzeko eta otorduak egiteko gogoa igarri dute bazkideen artean.
- Arrate Elkoro eta Aitor Astigarraga Durangoko Napar elkarteko kideak dira: "Zabaldu dugunean, berehala egin dira erreserbak; beraz, badago gogoa".
- Esti Ania Uribarren Abadiñoko Gaztañodi elkarteko kidea da: "Datorren astebururako ateak berriro ere zabaltzea da gure asmoa".
- José Ramón Lazkano Elorrioko Alkartu elkarteko kidea da: "Pandemian zehar txokoak zabalik izan ditugunean, jendeak neurri guztiak bete ditu".