2018ko irailean adin txikikoen kargu dauden emakumeak, bakarrik dauden emakumeak eta gaixorik daudenak hartzeko Berrizen aterpetxea zabaldu zuen Eusko Jaurlaritzak. Orduz geroztik, hainbat eta hainbat errefuxiatu igaro dira bertatik, herrialde desberdinetako migratzaileak. Asteon, berriz, Ukrainako lehenengo errefuxiatuak heldu dira bertara. Martitzenean heldu zen Ukrainako lehenengo familia aterpetxera. Aterpetxeko arduradunetako batek ANBOTOri azaldu dionez, Berrizko zentrora asteon heldu den familia "lur jota dago".
Oñatiko aterpetxetik bideratu dute familia hau Berrizko zentrora, eta ez da bertara helduko den bakarra izango. Dagoeneko Eusko Jaurlaritza zentroa egokitzen dabil eta datozen egunetan beste familia batzuk hartzeko asmoa dutela jakitera eman dute. Beste hiru bat familia gutxi gorabehera.