Ikusmina sortu du albisteak: Traña-Matienako frontoiak pilota partida berezia hartuko du maiatzaren 30ean, 19:00etan. Titin III.a eta Mikel Goñi elkarren aurka lehiatuko dira, bikoteka, pilotari abadiñar bi ondoan. Lehenengoak Iker Eskamezekin batera jokatuko du, eta, bigarrenak, Jon Aranarekin. Sarrerak Abadiñoko hainbat tabernatan eskuratu daitezke 10 euroan: Mesón, Goxoa, Tipi-tapak, La Despechada, Zelaietako jubilatuen tabernan eta Lagun Tokin.
Pilota partida esklerosi anizkoitzaren kontrako jardunaldiaren zati da. Kontua da maiatzaren 30ean, Traña-Matienako plazan egun osoko jaialdia egingo dela esklerosi anizkoitzarekin eta beste gaixotasun neurologiko eta neurodegeneratiboekin bizi diren pertsonei eta haien familiei laguntzeko. Pilota partidan baturiko dirua esklerosi anizkoitzaren kontrako elkartera bideratuko dute.
