Durangaldeak hautagai bi zituen trinketeko finaletan eta biek txapela eskuratu dute. Iaz elite mailako binakakoa irabazi zuen Asier Aspuruk Aitor Arabiourrutiagaz batera eta aurten buruz burukoan nagusitu da. Atzo jokatutako finalean 40-18 irabazi zion Zaramagako Dani Ibarrondori. Hasiera parekatuaren ostean, abadiñarrak partidua hautsi zuen sakean asmatzen hasi zenean. Aurten Bizkaiko buruz buruzko eta binakako txapelak ere lortu ditu Aspuruk.
Gazte mailako finalean Jon Arana eta Lur Ziarrusta geratu ziren txapeldun emozio handiko partiduan. Atxarteko bikoteak 40-38 menderatu zuen Txukun Lakuakoa. Partiduko zatirik handienean atzetik joan arren, azken txanpan buelta ematea lortu zuten. Aranak azpimarratzeko moduko maila erakutsi zuen partidu erditik aurrera.
