Bizikletak konpontzeko zein erosteko tokia. Gomendioak eskatzeko eta kontsultak egiteko tokia. Eta, orokorrean, behar duenari laguntzeko tokia. Izan txirrindularien beharrizanak ala izan gurpildun aulkiak erabiltzen dituzten herritarren beharrizanak, Jesus Cañas dendariak argi izan du beti herritarrak laguntzeko egin duela lan. Iragarri du, baina, amaiera data. Eguen honetan zabalduko ditu azkenengoz dendako ateak, eta barikuan, jai txiki bat eginda ospatuko du agurra. "Aitortza, esker ona, adierazi gura diet herrikideei", esan du. Horretarako pintxo ugari enkargatu du inguruko tabernetan. Barra txiki bat ipinita, afari merienda egingo du dendan bertan, 19:30etatik 22:30etara.
Cañas dendaren itxieragaz, Zornotza bizikletak erosteko eta konpontzeko dendarik barik geratuko da aurrerantzean. Halantxik dio Jesus Cañasek berak: "Sasoi batean hiru bizikleta denda zeuden herrian, orain, bakarra, hauxe. Eta eguenean emango diot bukaera". Hori bai, argi dauka etorriko dena: "Denda zarratuko dut, bai. Baina elkar ikusten jarraituko dugu", esan du dendariak.