#0km

Uxarte sagardotegiak bertsolariekin eta trikitilariekin hasiko du denboraldi berria

Anboto 2023ko urt. 12a, 12:58

Urtarrilaren 20an afari berezia egingo dute Oihana Bartra eta Aitor Etxebarriazarraga bertsolariekin. Etxebarria aita-semeak trikitixa giroa ipintzeaz arduratuko dira, eta jaian ez dira txalapartariak faltako.

Euskal Herriko sagardogileek denboraldi berria zabaldu dute, eta Zornotzako Uxarte sagardotegian jai berezi batekin hasiko dute sasoi berria. Urtarrilaren 20an inauguratuko dute uzta berria, iluntze aldera. Bertan egongo dira Oihana Bartra eta Aitor Etxebarriazarraga bertsolariak, Etxebarria aita-seme trikitilariak eta jaia girotzera hurbildutako txalapartariak lagun. Afaria 21:00ak aldera izango da. 

Euskal Sagardoa egiten duten 48 sagardogile daude Araban, Bizkaian eta Gipuzkoan. Guztira "1,2 milioi sagardo litro egin dituzte, bertako 250 sagastietako 2 milioi kilo sagar" erabilita. Uzta txikia izan dute, baina "tanino altuko eta izaera handiko" sagardoak lortu dituzte. Iazko uztaren aldean, alkohol graduazio handixeagokoak. Prezioei dagokienez, sagardogileek %25 igoko dituzte kopuruak. Testuinguru orokorrari eragiten dion inflazioak arrastoa utzi du sagardogintzan ere, batez ere, "beiraren, kartoiaren, energiaren eta gasoilaren" igoera dela eta. Sagardogileek prezioak eguneratu beharra beste erremediorik ez dute izan, "egoerari aurre egin ahal izateko".

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!