Koronabirusak eragindako testuinguru ezohikoaren aurrean, "herritar guztien ongizatea eta osasuna bermatzeko" helburua markatu du Zornotzako Udalak. Babes sozialerako neurriak hartu ditu, eta zailtasun ekonomikoak dituzten familiengan ipini du arreta. "Bereziki kezkatzen gaituzte zailtasun ekonomikoak dituzten familiek", esan du udalak. Horregatik, Zornotzako Eroski eta Lidl supermerkatuen laguntzari esker, udalak "oinarrizko produktuak" eman dizkie familia horiei (elikagaiak eta higiene produktuak). "Une honetan 50 familiek laguntza jaso dute", azaldu du udalak. Bestalde, telefono bidezko jarraipena egiten ari zaie adinduei eta menpekoak diren herritarrei. "Herriko sare ekonomikoa babesteko helburuarekin", berriz, beste neurri bat ihartu du: udal zergen eta tasen kobrantzak eten ditu "alarma egoera amaitu arte".
Desinfektatze lanak
Herriko inguruak desinfektatzeko neurriak hartuak ditu jada udalak. Herritarren joan-etorria handixeagoa den tokietan egin dituzte: supermerkatuetako eta botiketako sarreretan, paperontzi eta edukiontzietan eta arkupeetan, besteak beste.
Udaletxea eta Herritarren Arreta Zerbitzua zabalik daude, baina udalak gogora ekarri du herritarren batek zerbait behar izatekotan, komunikazio telematikoa lehenetsi behar duela. Udalari lotutako kudeaketaern bat egiteko 946300190 telefonora deitu 688866600 WhatsApp zenbakira idatzi edo beste honako helbide elektroniko honetara jo daiteke: haz@amorebieta.eus.
Herritarrei "erantzunkizunez" jokatzea eskatu die udalak, "beraien bizitza edo inorena arriskuan ez ipintzeko".