Arlo horretako langileen lan baldintzen prekaritatea gizarteratzea da helburua. "Zaintza lanetan dabiltzan emakumeen errealitateak eta egoerak bisibilizatzeko espazio seguru bat sortu gura dugu", azaldu du Zornotzako Talde Feministako Amaia Fernandezek mahai-ingurua antolatzeko arrazoiaren inguruan. Gai horretan adituak diren hizlariak gonbidatuko dituzte, baina ekimen zabala eta parte-hartzailea izatea gura dute, ideien trukaketarako gune bat izan dadila. "Horregatik, dei egiten diegu zaintza lanetan dabiltzan herriko emakumeei euren ekarpenak, egoerak eta gogoetak bertara ekartzeko", dio Fernandezek. Oraingoa ez da zaintza arloko emakumeen gaia gizarteratzeko egiten duten lehenengo ahalegina. Esaterako, uztailean kontzentrazio bat egin zuten Zornotzan, sektore horretan dabiltzan emakumeen lan baldintzak hobetzea eskatzeko, eta Emakumeen Nazioarteko Egunean, martxoaren 8an, lanbide feminizatuen inguruko solasaldi bat egin zuten.
Elkarretaratzea
Indarkeria Matxistaren Kontrako Egunean bertan, azaroaren 25ean, mobilizazioa eta ekitaldia egingo dituzte, Indarkeria matxistaren aurrean, autodefentsa feminista lelopean. Zornotzako Erreferendum plazatik abiatuko dira, 19:00etan.