Zornotza Saskibaloi Taldea estu zebilen. Klubetik behin baino gehiagotan adierazi dute Zilarrezko Ligan jarraitzeko babesle indartsuren baten beharra zutela. Bada, lortu dute laguntza hori. Trienekens multinazional alemaniarrak Zornotzan du Europa hegoaldeko planta nagusia eta akordioa lortu dute eurekin, klubeko webgunean iragarri dutenez. Hondakinen kudeaketa integrala jorratzen duen enpresa da. Zornotzako klubetik “esker oneko” agertu dira eta Zilarrezko Ligako proiektuari jarraipena emateko lagungarri izango zaiela azaldu dute.
Asteburuan bertan estreinatuko dute publizitatea kamisetetan. Igoera faseari begira, partidu garrantzitsua jokatuko du Zornotzak zapatuan, 20:00etan, Larrea kiroldegian. Avila taldea izango du aurkari.