Batzordeak enpresaren jokabidea gaitzetsi du, "kaleratzeak formalizatu arte ez dietelako langileen ordezkariei ezer" jakinarazi. Horrez gainera, sindikatuek diote enpresak ez duela "inolako konpromisorik agertu kaleratze gehiagorik ez egoteko". Otsailaren 18an berriro mobilizatuko dira langileak.
ELAk astelehenean eman zuen kaleratzeen berri, eta azaldu zuen enpresak "urtarrilaren 30ean" egin zituela kaleratzeok. "Enpresak dio salmentak gutxitu egin direla AEBetako muga-zergen eraginez. Alabaina, guk ez dugu uste horrela denik. Izan ere, iaz, beharginak ordu poltsa negatibo batekin gelditu ziren, eta aurten, ordu horiek berreskuratzen hasi dira. Ehun ordu, guztira", azaldu zion hedabide honi Javier Garciak, Gernikako eta Durangoko ELAko industria arduradunak: "Horrenbestez, lan jaitsiera bat egotea ezin ulertzekoa da", esan zuen.
