Faben Ituarte Olazar txapelketako finalerdietara sailkatu da

Faben Ituarte Etorkizuneko Olazar Pilota Txapelketako finalerdietara sailkatu zen atzo lau eta erdiaren barruan; 22-15 irabazi zion Ramirezi.

Partiduko gakoetako bat sakean egon zen. Aurrelari atxondarrak sei tanto egin zituen hasierako pilotakadarekin. Horrez gainera, partidu osoan zehar seguru aritu zen, pilota gutxi galduz, eta ezkerrez min handia egin zuen, bai gantxoz eta bai bi hormakoak jota. Ramirezek partidua galduta ikusi zuenean (19-10) egin zituen tantorik onenak. Aipagarriak dira segidan egindako hiru gantxo, bat txokoan eta bi zabalean. Takada horri eskerrak 19-15 hurreratu zen. Ituartek kantxa erditik ezkerrez egindako bi hormako eder bati esker berreskuratu zuen sakea eta zuzenean joan zen 22ra. 21. tantoa partiduko ederrena izan zen: kalitatez beteriko zazpi pilotakada. Ramirezek bikain bueltatu zuen Ituarteren sake gaiztoa; segidan atxondarrak gantxo zehatz bi bideratu zituen zabalera eta txokora, baina Ramirezek meritu handiko lana egin zuen defentsan. Zazpigarren pilotakadan, Ituartek ezkutatu egin zuen gantxoa zabalean. Azken tantoa sake-errestoan lortu zuen, airez pilota txokoan goxo-goxo utzita.

Lau eta erdiko beste partiduan Cestauk 22-11 menderatu zuen Ibarluzea eta finalerdietarako sailkatu zen. Atzoko partidu biak LOTURA HONETAN ikusi daitezke.

Lau eta erdiko azken final laurdenak domeka honetan (azaroak 30) 18:00etan jokatuko dira:  Beitia Nazabalen aurka eta Egiguren Muruaren kontra.