Lur-jausia Zaldibarren

Zaldibarko zabortegia egonkortzeko eta egokitzeko lanak gaur amaituko dituzte

18 hilabete pasatu dira Verter Recycling hondakindegiko luiziak Alberto Sololuze eta Joaquin Beltran beharginak harrapatu zituenetik.

Eusko Jaurlaritzak jakinarazi duenez, gaur amaituko dituzte Zaldibarko hondakindegia egonkortzeko eta egokitzeko lanak. Maiatzaren 14tik hona aritu dira lan horietan, Joaquin Beltran bilatzeko lanak amaitzea erabaki zenetik hona. Besteak beste, hondeatze lanak egin dituzte zabortegia eusten duen oinarrian zehar, eta dike frontal gehigarri bat atondu dute, egonkortasuna bermatzeko. Jaurlaritzak azpimarratu du zabortegia kokatzen den lur eremua "egonkorra" dela, eta ingurua "etorkizunean ere egonkorra" izango dela. Estabilitatea kontrolatzeko neurketek halaxe frogatzen dutela gaineratu du. Bestalde, Jaurlaritzak azaldu du drainatze-sistemak instalatu dituela isurketak ekiditeko. 

Behin betiko itxiera

Etorkizunera begira zabortegian inolako hondakinik ezingo dela hartu azpimarratu du Jaurlaritzak. Hemendik aurrerako lanak hondakindegia zarratu osteko beharretara mugatuko dute. Hau da: aurrerantzean, "ingurumen-baimen integratuan finkatutako betebeharrak" eguneratuko dituzte. "Behin betiko zigilatzea, zabortegia itxi ondoko mantentzea eta lixibiatuen tratamendua" hartuko dituzte kontuan.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.