Amiantoak "lur-jausiaren eremuan" eragingo luke
Elena Moreno sailburuordeak "ez du uste" amiantoak arriskurik sortuko duenik "lur-jausiaren eremu zuzenetik haratago". Edozelan ere, datu guztiak "kontrolpean" izateko lanean ari direla nabarmendu du, "ohi bezala, osasun publikorako laborategiaren analisiak" aintzat hartuta.
Lixibiaturik ez erreketan, "uneotan"
Hondakindegiaren inguruko errekastoetan ur-laginak hartu eta aztertu dituztela azaldu du Morenok. Horien arabera, urek ez dute lixibiatuen arrastorik agertzen "uneotan". Dena den, hondakindegitik filtratutakoak urak kutsatuko ote dituen "kezka" du Morenok, eta, horrenbestez, azterketak egiten jarraituko dutela.
Sutearen jatorria, "metanoa"
Ingurumen sailburuordeak azaldu duenez, "ohikoa" da hondakindegietako materialen artean gas metanoa sorteza. Sailburuordearen arabera, horrek piztu ahal izan du sutea.
Hondakindegia egonkorra zen "2019ko maiatzeko txosten baten arabera"
Hondakindegiaren egonkortasunari buruz, Morenok esan du Jaurlaritzak 2019ko maiatzean datatutako txosten bat duela, eta hondakindegia egonkorra zela jasotzen duela. Enpresaren partetik beste jakinarazpenik ez duela jaso esan du, "ez lur mugimenduengatik ez arrakalengatik".
