Iurretatik kanpoko jende askok kotxea herrigunean uzten zuela-eta, araudi berria prestatu du udalak, eta praktikan ipintzen hasi da. Aldaketa nagusietako bat da iurretarrek eurentzat gordetako aparkalekuak dituztela: Tellituko aparkalekua gorde dute eurentzat, eta Zubiaurre eta Bidebarrieta kaleetan ere egoilarrientzako lekuak daude. Asteon aparkatzeko lekua egon da toki horietan. Tellitun, adibidez, hamar autotik sei Iurretan erroldatu bakoa zela zenbatu zuten mugikortasun azterketa batean.
Leku berezitu horietan kotxea uzteko egoiliar txartela atera behar dute iurretarrek. Erregistroan mugimendua egon da asteon; 200 bat herritarrek eskatu dute honezkero txartela. Doakoa izango da urtea amaitu arte, eta urtean tasa bat ordaindu beharko da 2015etik aurrera. Datorren astean eztabaidatuko dituzte tasak eta zergak, osoko bilkuran.
Doako TAO sistema
Askondo eta Bidebarrieta kaleetan gehienez ordu eta erdi aparkatzeko 45 leku ipini dituzte. Tiketa hartu behar da udaltzainen bulego aurreko makinan, eta doakoa da. Horretaz gainera, trafikoa itxi egin dute Askondo kalean, Bidebarrietarako noranzkoan, herriguneko trafikoa gutxitzeko asmoz.