Jaietako ekintza ia guztiak plaza inguruan izaten direnez, herrigunean giroa sortzeko jarduerak prestatu dituzte aurten. Horrela, gauerditik aurrera Askondoko agertokian DJ Braxx egongo da, tabernariek kontratatuta. Zapatuan, berriz, gazte asanbladak urtero antolatzen duen tortilla txapelketa izango da herrigunean.
Txapliguen ordua
Asteburu betea izango bada ere, egun indartsuena San Migel bezpera izango da. Zapatu gauez Baraia Band, Fiachras eta Exaixu taldeen kontzertuak egon arren, goizetik hasiko dute eguna domekan. 12:00etan Montoitik txapliguak botata emango dute abisua. Arratsaldean Donien Atxa jaso, eta dantzariek, neska eta mutil, iaz bezala, azken entsegua egingo dute. Aurretik giroa egongo bada ere, orduan hasiko dira jaiak ofizialki.
