Gontzal Murgoitiok Espainiako Trail Federazioen arteko Torneoa irabazi du 20 urtez azpiko mailan

Sorginen Lasterketa irabazi zueneko irudia.

Atzo Ibizan lehiatutako txapelketan bigarren urtez jarraian lortu zuen garaipena.

Mendiko lasterketetan espezialista da elorriar gaztea eta garaipena ez da sorpresa izan, faborito nagusia Adam Maijo kataluniarra zen arren. Honako hau izan da Murgoitioren denbora: 31.04.

"Hiru txandatan irten gara eta niri azkenengoan irtetea egokitu zait. Beraz, hasieratik egurrean joan behar izan dut lehenengo taldearekin bat egiteko. Probako igoera amaitzerakoan lortu dut bat egitea eta horrek segurtasuna eman dit, aurrekoak baino minutu bat geroago irten naizenez, alde hori nuelako. Jaitsiera oso arina izan da eta ezin izan dut tartea handitu. Baina oso pozik eta gustura nago egindako lanarekin", adierazi du korrikalari elorriarrak.

Murgoitiok Sorginen Lasterketa irabazi zuen irailean, sekulako erakustaldia emanda.

 

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.