Durangoko Wadokan klubak arte martzialen '12 harri' opena antolatuko du zapatuan, egun osoan zehar, Landako kiroldegian. Estatuko dozena bat kluben 300 bat ariketa ikusteko aukera egongo da. Horrela iaz hasiko bideari jarraipena emango diote, izan zuen harreragaz gustura geratu ostean. Klubeko kideen helburua da opena erreferente bihurtzea estatuko iparraldean.
Open batek diziplina anitzeko borrokalariak ekimen berean batzeko aukera eskaintzen du: karatea, taekwondoa, ninjutsua… "Bere osotasunean, lehiaketa ikusgarria da. Horrelako lehiaketek beste edozeinek baino hobeto islatzen dute Wakokan klubaren filosofia; hau da, arte martzialak errespetuan oinarritutako garapen pertsonalerako erraminta lez erabiltzea", adierazi dute klubeko kideek ohar batean.
Zapatuan ikusgai egongo den erakustaldien artean Raul Gutierrez maisu handiak eskainiko duena dago.