Landako Gunea prest dago durangarren historiako lehen herri galdeketa hartzeko. Udalak 17 hautetsontzi atondu ditu bertan eta galdeketan parte hartzeko deia egin die herritarrei. Guztira 24.700 durangarrek izango dute botoa emateko aukera eta guztia modu egokian egiten dela ziurtatzeko 7 udal behargin eta 51 boluntario ibiliko dira lanean. Hautetsontziak goizeko 9:00etan zabaldu eta 20:00etan zarratuko dituzte.
2019ko azaroan Durangoko udalbatzak herri galdeketa egiteko baimena eskatu zion Madrilgo ministroen kontseiluari. Udalbatza osatzen duten lau alderdi politikoek aho batez onartu zuten eskari hura tramitatzea. Handik hilabete batzuetara ailegatu zen Madrilgo gobernuaren erantzuna: argi berdea eman zion galdeketa egiteari. Erabaki plataformak adierazi du biharko eguna iristeko "pozik eta ilusioz" dagoela.
ANBOTOk gaurko egunaren jarraipen berezia egingo du web orri honetan goizetik hasi eta galdeketaren emaitza zein den jakitera ematen den arte.