Euskadiko tokian tokiko erakundeen 2/2016 legearen 80.4 artikulua aintzat hartu dute Erabakikoek herri-galdeketa eskatu ahal izateko; iaz udalak onartutako Parte-hartzerako ordenantzak ere aukera hori jasotzen du. Maiatzaz geroztik sinadurak batzen ibili dira, eta berez udazkenean jarraitzeko asmoa bazuten ere, trenbide zaharrerako plana udalean aurkeztu izanak ideiaz aldatzera eraman ditu. "Lege-dekretua aurreratzeko Durangoko Udaleko gobernu taldeak agertutako presa eta urgentzia" aipatu ditu eskaera jadanik egiteko arrazoi lez. Aitziber Irigoras alkateak planaren aurkezpenean adierazi zuen dekretu bidez onartu ahalko dela proiektua, osoko bilkuratik pasa barik; hala ere, lehenik jendaurrean ikusgai jarriko dela ere iragarri zuen, eta iritziak batuko direla bertan. Udalean batzorde publiko bat egingo dute bihar gaiari buruz, eta Erabaki plataformak bertara joateko deia ere egina du.
Durangarren 3.033 sinadura dira gaur entregatu dituztenak. "Durangok hitz gin du, erabaki nahi du", esanez baloratu dute emaitza. Legearen arabera, erroldatuen %10en sinadurak behar dituzte, eta egiaztatze bidean, badirudi beharrezko adina lortu dutela.
