Legegintzaldiaren erdira ailegatuta, orain arteko balantzea egin eta aurrera begirako erronkak marraztu ditu Durangoko EH Bilduk, Pinondo Etxean garatutako asanbladan. Trenbideko lurrekin lotuta, "gaur egungo proiektuaren aurrean alternatibak eraiki beharra nahitaezkoa dela" adostu zuen asanbladak, alderdiak prentsa oharrean azaldu duenez. Etorkizuneko helburuekin jarraituta, aipatzekoa da Durangoko EH Bildu eraberritzeko lanean dagoela Era prozesuaren bitartez, eta horri "garrantzia berezia" eman diote kideek. Bestalde, auzoak aktibatzea eta herritarren partaidetza sustatzea ere erronka lez markatu dituzte.
Alderdiaren arabera, "oso positiboki" baloratu zen orain arte herritarrekin izandako hartuemana, auzolanen edota auzo batzarren bidez.
