anboto.org

Euskal Herriko historiako aldi baten garrantzia, antzerkiratua

  Kultura  Durango
Urrian Gernikako Lizeo antzokian egin zuen Banarte antzerki taldeak Guernica 1913 obraren estreinaldia, eta Abadiñoko Errota kultur etxean egin zuten aurrestreinaldia. Harrera oso beroa egin zion publikoak obrari.

 

Durangoko San Agustinen izango da bihar emanaldia, eta, gero, Erandion eta Urdulizen ere eskainiko dute Guernica 1913 antzezlana. Bestalde, gaur, 18:30etik aurrera, Durangoko Andra Marin egongo dira Banarteko kideak, jendea biharko emanaldira gonbidatzeko: kalera aterako dute obraren eszenografia, promoziorako.

Benetako gertakarietan oinarrituriko obra da Guernica 1913: Gernikazarra historia taldeko Txato Etxanizek jasotako informazioan oinarriturik, eta bere aholkularitzagaz, Rafa Hercek duela 15 urte inguru idatzirikoa. Durangoko Geroa antzerki taldeko kide izandako Sardo Irisarri da obraren zuzendaria, eta, besteak beste, Aitor Coello taldekideak egindako musika dauka.

XX. mende hasieran Gernikan jazotako klase borrokari loturiko gertaera historikoa du oinarri antzezlanak: armagintzako Esperanza y Unceta enpresako (gero Astra izenez ezaguna egingo zena) langile eibartarrek 1913ko udazkenean Gernikan egin zuten greba.

Lantokia Eibartik Gernikara aldatu dietenean, Busturialdera lanera eta bizitzera doazen Fermín Larragoicoa eta Justina Garate bikotea, eta Arrate euren alaba dira Banarteren lanaren protagonistak. Antagonikoak ziren bi munduren, bi klase sozialen, elkartzetik sortu zen gizarte berriari buruzko obra da, eta ehun urte geroagoko, gaur egungo, gizarteari buruzko gogoeta ere egiten du Banartek. Izan ere, antzezlaneko eszenetako batzuk 2013. urtean kokatu dituzte.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa