Behargintzaren eraikinean atondutako aldi baterako aterpetxea hasia da fruituak ematen eta babesa eskaintzen. Hango geletan oinarrizko elikadura eta higiene-beharrak asetzen laguntzeko baliabideak dituzte etxebakoek. Besteak beste, hamakak, mantak, garbiketa eta higiene pertsonalerako produktuak, garbitegia, elikagaiak, mikrouhin-labea, hozkailua, material higienikoa eta norbera babesteko ekipamenduak eskaintzen dira. Eguneko egonaldirako 20 plaza eta gauerako beste 10 eskaintzen ditu. Azken hauek Errota ostatuan erabilgarri dauden plazei gehitzen zaizkie. Amankomunazgoko iturriek azaldu dutemez, Gurutze Gorriko kideek eta segurtasun teknikariek 24 orduko zaintza eskaintzen dute.
Zerbitzu berria martxan: arreta psikosoziala
Etxebakoei eskaintzen zaien zerbitzua hobetze aldera, psikologo baten zerbitzua ere ipini du martxan. "Zerbitzu berri honen helburua astean zehar eguneroko bizikidetzaren ondorioz sortzen diren gatazkak kudeatzea" dela azaldu du Amankomunazgoak. "Gatazkarako gaiak aurrez identifikatzen dira, arreta psikosozialeko asteko saioan elkarrekin lantzeko". Zerbitzuak harrera ona izan duela azaldu dute, "bai erabiltzaileen artean, bai aterpetxea zaintzen duten langileen artean".