Lur-jausia gertatu baino lehen "hondakindegi azpiko hoditeriak" hartzen zituen hondakinen artean sortzen ziren ur eta isurketak. Halaxe esan du gaur Ernesto Martinez De Cabredo URA agentziaren zuzendariak. Adierazi du lur-jausiak suntsitu egin zuela hoditeria sistema, eta hori berritzeko lanak gaur arratsaldean edota bihar goizean hasiko dituztela. Ustez, lixibiatuen isurketen zati bat ekidingo lukete hodiek.
Lixibiatuak uretan
Uraren beraren kalitateari buruz azaldu du amonio kantitate altua dutela Eitzaga inguruetako urek. Otsailaren 11n ekin zion URA agentziak inguruetako ur analisiak egiteari. Emaitzak atzo jakinarazi zituen. Ohi baino amonio kantitate handiagoa detektatu zuten Aixola, Ego eta Eitzagabarrena inguruetan. Kadmioa eta selenioa bezalako konposatuak ere agertu dira, baina, dioenez, "neurri txikian". "Egon, badaude elemetu horiek. Analisiek hala jasotzen dute, baina ez dago kezkarako arrazoirik".
Kontsumorako urari dagokionez ere, eman ditu azalpenak Martinez De Cabredok: "amonioirik ez da sartuko kontsumorako uretan". Eitzaga eta inguruetako hainbat baserrik ur-manantiala jaso izan dute orain arte, sare publikotik kanpoko ura. Bizilagun horiei ur-deposituak ipini zizkieten duela egun batzuk.