Lortutako errekonozimenduagaz "oso pozik" daudela aitortu dute Anbe baserriko kideek. "Ordiziako gazta lehiaketako finalean sartzea egundoko saria da. Edizio batzuetan sartu izan gara finalera. Baina finalerako sailkatu eta gainera bosgarren saria irabaztea,... hori egundokoa da. Oso pozik gaude", azaldu dute gaztandegiko iturriek.
Alde horretatik, atzoko lorpena urte osoko lanaren errekonozimendua dela azpimarratu dute, artzain gaztagile orok urte osoan zehar egiten duen lanarekiko aitortza: "Gazta ondo egiteak urte osoko lana eskatzen du. Ardiari eragiten dion aspektu bakoitza zaindu behar duzu etengabe. Zaintza lanak, aharia, elikadura, elikagai duten zelaietako belarra garbi mantentzea, etxean hartzen duten elikagaia kalitate onekoa izatea, gaztaren hezetasuna zaintzea... denak eragiten du. Horrenbestez, atzokoa moduko errekonozimenduak oso pozgarriak dira", azaldu dute gaztandegiko kideek.
Ordiziako gazta txapelketan lehenengo bost sailkatuek osatzen dute podiuma. Gaztandegi abadiñarrak Ordizian sekula lortu duen markarik onena eskuratu zuen atzo. Lehengo saritua Ilarduiako La Leze gaztandegia izan zen (Asparrena, Araba). Bigarren saria Nafarroako Kortaria gaztandegiak irabazi zuen (Lekaroz, Baztan); Ondarre izan zen hirugarren (Segura, Gipuzkoa) eta Nafarroako Loperena gaztandegia laugarren (Egozkue, Anue Harana).
BIDEOA:
- Goierri Telebistak atzoko gazta lehiaketaren kronika jaso du bideo honetan.