Eguenetako loteriako lehen saria 97379 zenbakiak jaso du eta Matienako Petite prentsa dendan zenbaki hori duen dezimo bat saldu dute. Hau da, dezimo horren jabeak 30.000 euro eskuratu ditu. ANBOTO Martin Petite liburudendako jabeagaz egon da eta "oso pozik" daudela aitortu du.
Azken urteotan bolada onean daude Matienako prentsa denda eta hainbat dira bertan emandako sariak. Iazko azaroan esaterako Euromilioiko zozketan miloi bat euro egokitu ziren bertan. Eta dagoeneko egueneko loteriako hiru lehenengo sari eman dituzte. "Zortea aldeko daukagu argi dago eta hori bezeroek ere nabaritu dute. Azken bi urteotan loteria erostera datozenen kopurua hirukoiztu egin dela igarri dugu. Gainera, ez dira bakarrik herrikoak, kanpotik ere asko etortzen zaizkigu Durangotik, Berriztik... Oso eskertuta gaude", aitortu du Martin Petite jabeak.