Noiztik zabiltzate Euskal Herrira itzuli guran?
Duela astebete inguru unibertsitatea itxi ziguten, eta Argentinan gauzak okertzen hasi zirela ikusi genuen. Orduan, onena etxera bueltatzea zela pentsatu genuen. Kontsulatuarekin eta unibertsitatearekin hitz egiten hasi ginen, besteak beste. Kontsulatuan hegaldiak hartzeko zerrenda bat zegoela esan ziguten. Zerrenda horretan lehentasuna hegaldia erosita zutenek dutela esan ziguten, ostean pertsona zaurgarriak zeudela eta ondoren, beste guztiak geundela. Orduan onena gure kontura mugitzen hastea zela pentsatu genuen.
Zer egin zenuten?
Cordobako probintziako kontsulatutik Txileko edo Brasileko fronteratik hegaldi bat hartzea aukera bat izan zitekeela esan ziguten. Birritan pentsatu gabe hegaldia hartu genuen, bakoitzak 800 bat euro ordainduta eta Argentinako iparraldetik Buenos Airesera joateko taxi batean sartu ginen. 17 orduko bidaia egin genuen taxian eta bidean hainbat kontrol pasatu behar izan genituen. Kontsulatuak bidean ibiltzeko emandako baimenarekin aurrera egiten genuen. Baina bidean gindoazela hegaldia bertan behera gelditu zela jakitera eman ziguten. Hala ere, Buenos Aireserarte joatea aukerarik onena zela pentsatu genuen, hegaldiak hemendik irtetzen dira eta. Hemen, Buenos Airesen, Carlos ezagutu genuen, eta orain bere etxean gaude. Gaur, etxe batera joango gara. Hor behintzat lau egunerako lo lekua izango dugu.
Kontsulatuan zerbait esan dizuete?
Oraingoz ezer ez, beraiek zerbait esateko itxaroten gaude. Espero dugu egin dugun bideo honekin Euskal Herritik laguntzaren bat jasotzea eta gure egoera ahalik eta arinen konpontzea.