Atzo mendi lasterketen Munduko Kopako seigarren proba jokatu zen, Italian, Livigno herrian, eta Oihana Azkorbebeitia korrikalari abadiñarra laugarren postuan sailkatu zen. 34 kilometroko lasterketa izan zen, 2.700 metroko desnibel positibokoa, eta 3.000 metro inguruko hiru mendi igo zituzten. Azkorbebeitia postuak aurreratzen joan zen kilometroek aurrera egin ahala, eta, azkenean, laugarren egin zuen Sheila Aviles katalanaren, Elisa Desco italiarraren eta Gisela Carrion katalanaren atzetik. Euskal selekziokidea den Mayi Mujika urretxuarra hamargarren sailkatu zen, eta Ander Iñarra lezoarra zazpigarren, mutiletan.
Livignoko lasterketa Munduko Kopan puntu kopuru bikoitza ematen duen lau lasterketetako bat da, eta atzoko laugarren postuari esker zakuratu dituen puntuekin, Azkorbebeitiak dezente egin du aurrera sailkapen nagusian. Seitik hiru lasterketatan parte hartuta, bosgarren jarri da orain sailkapen nagusian.